טייטש יהואש איוב פרק יא

פֿון װיקיביבליאָטעק
דאס פריערדיק זייטל - - צוריק צו טייטש יהואש אויף תנ"ך כתובים - - דאס קומענדיק זייטל


פרק א - - - פרק ב - - - פרק ג - - - פרק ד - - - פרק ה - - - פרק ו - - - פרק ז - - - פרק ח - - - פרק ט - - - פרק י - - - פרק יא - - - פרק יב - - - פרק יג - - - פרק יד - - - פרק טו - - - פרק טז - - - פרק יז - - - פרק יח - - - פרק יט - - - פרק כ - - - פרק כא - - - פרק כב - - - פרק כג - - - פרק כד - - - פרק כה - - - פרק כו - - - פרק כז - - - פרק כח - - - פרק כט - - - פרק ל - - - פרק לא - - - פרק לב - - - פרק לג - - - פרק לד - - - פרק לה - - - פרק לו - - - פרק לז - - - פרק לח - - - פרק לט - - - פרק מ - - - פרק מא - - - פרק מב


א וַיַּעַן צֹפַר הַנַּעֲמָתִי וַיֹּאמַר.
ב הֲרֹב דְּבָרִים לֹא יֵעָנֶה, וְאִם אִישׁ שְׂפָתַיִם יִצְדָּק.
ג בַּדֶּיךָ מְתִים יַחֲרִישׁו, וַתִּלְעַג וְאֵין מַכְלִם.
ד וַתֹּאמֶר זַךְ לִקְחִי, וּבַר הָיִיתִי בְעֵינֶיךָ.
ה וְאוּלָם מִי יִתֵּן אֱלוֹהַּ דַּבֵּר, וְיִפְתַּח שְׂפָתָיו עִמָּךְ.
ו וְיַגֶּד לְךָ תַּעֲלֻמוֹת חָכְמָה כִּי כִפְלַיִם לְתוּשִׁיָּה וְדַע כִּי יַשֶּׁה לְךָ אֱלוֹהַ מֵעֲו‍ֹנֶךָ.
ז הַחֵקֶר אֱלוֹהַ תִּמְצָא, אִם עַד תַּכְלִית שַׁדַּי תִּמְצָא.
ח גָּבְהֵי שָׁמַיִם מַה תִּפְעָל, עֲמֻקָּה מִשְּׁאוֹל מַה תֵּדָע.
ט אֲרֻכָּה מֵאֶרֶץ מִדָּהּ, וּרְחָבָה מִנִּי יָם.
י אִם יַחֲלֹף וְיַסְגִּיר, וְיַקְהִיל וּמִי יְשִׁיבֶנּוּ.
יא כִּי הוּא יָדַע מְתֵי שָׁוְא, וַיַּרְא אָוֶן וְלֹא יִתְבּוֹנָן.
יב וְאִישׁ נָבוּב יִלָּבֵב, וְעַיִר פֶּרֶא אָדָם יִוָּלֵד.
יג אִם אַתָּה הֲכִינוֹתָ לִבֶּךָ, וּפָרַשְׂתָּ אֵלָיו כַּפֶּךָ.
יד אִם אָוֶן בְּיָדְךָ הַרְחִיקֵהוּ, וְאַל תַּשְׁכֵּן בְּאֹהָלֶיךָ עַוְלָה.
טו כִּי אָז תִּשָּׂא פָנֶיךָ מִמּוּם, וְהָיִיתָ מֻצָק וְלֹא תִירָא.
טז כִּי אַתָּה עָמָל תִּשְׁכָּח, כְּמַיִם עָבְרוּ תִזְכֹּר.
יז וּמִצָּהֳרַיִם יָקוּם חָלֶד, תָּעֻפָה כַּבֹּקֶר תִּהְיֶה.
יח וּבָטַחְתָּ כִּי יֵשׁ תִּקְוָה, וְחָפַרְתָּ לָבֶטַח תִּשְׁכָּב.
יט וְרָבַצְתָּ וְאֵין מַחֲרִיד, וְחִלּוּ פָנֶיךָ רַבִּים.
כ וְעֵינֵי רְשָׁעִים תִּכְלֶינָה וּמָנוֹס אָבַד מִנְהֶם, וְתִקְוָתָם מַפַּח נָפֶשׁ. {פ}